返回列表 回復 發帖

《 你而家無 但係將來會有 (上) 》全新派台作品

作曲:C君
填詞:農夫
編曲:DJ Tommy / 咖啡因公園
監製:DJ Tommy

Lyric @ Lemon Music Group  檸音樂歌詞網

你覺得我得嘅話 put your hands together
掌聲俾多幾吓 好嗎

好多人問我哋點解咁耐唔出碟
我想問你對上嗰次幾時買過碟
以前出唱片就話賣幾多白金
今日我出碟你問我要做定幾多帛金

唔係話舊歌好聽啲 係新歌冇留意
就算我去唱K時都係唱《狂串樂基兒》
啲新歌 係喎 我冇一隻識
但係記得韓星染過髮嘅每一隻色

新人唔算多 但係邊個打邊個
我分唔清金曲喎 但係我一隻都冇聽過
到年尾頒獎禮 噏得出歌名都算唔錯
跟住唱到幾句應該頒個獎俾我

其實啲樂迷係咪咁諗 我唔係好關心
你有你好聲音 我有我好天真
唔洗話俾人聽我係歌手架
只要我哋仲有全新派台作品

你覺得我得嘅話 put your hands together
樂壇幾難行 都需要撐
就係爭你爭你爭你爭你一齊玩
人人實唱到 大家一齊嚟La
Do Re Mi Fa So ( La~~~~ )

有人話歌手要拍劇 拍劇先入屋
歌影視都十足 咁先至多人十卜
但係我哋好老套 唔識諗咁多promo
淨係相信嗰套叫做好歌有好報

有人話做首歌要聽到錢聲
我話你俾錢我做歌已經係嫌錢腥
我冇嘢驚架 戶口跌過落雙位數
就算出碟冇人買咪最多自己鑲喺度

好多人叫 我哋做國語歌
可惜我識嘅國語唔多
又希望廣東歌可以代代相傳
真係打得嘅話 南拳都可以北傳

好多歌手要你支持 怕你愛得太遲
等你加入樂壇等到去葡萄成熟時
你贈我興奮 我贈你聲音
你贈我幾廿蚊 我贈你全新派台作品

你覺得我得嘅話 put your hands together
樂壇幾難行 都需要撐
就係爭你爭你爭你爭你一齊玩
人人實唱到 大家一齊嚟La
Do Re Mi Fa So ( La~~~~ )

開嚟 大吉大利 百無禁忌
我哋老細叫我爭氣 俾啲掌聲啦淨係爭你
屬乜嘢生肖唔洗迴避 我有下巴雙腳掂地
個樂壇仲未死 俾啲掌聲啦淨係爭你
大家一齊嚟啦 
你都一齊嚟啦

返回列表