返回列表 回復 發帖

14 HK Rap Up (Full Version) - MastaMic

本帖最後由 檸音樂 於 2015-2-19 05:46 編輯

作曲:MastaMic / 陳瑋洛
填詞:MastaMic
編曲:陳瑋洛
監製:MastaMic

Lyric @ Lemon Music Group  檸音樂歌詞網

馬米仲未死得係度say個wassup 咁又一年我梗係知你哋最想聽乜
好多人都唔鍾意聽rap但鍾意聽rap up 所以每一年都必須要聽rap up乜乜乜
譚玉瑛姐姐係兒童節目界代表 祝你以後青春常駐 We will be missing you
杜汶澤過去一年是非認真多 首先係伍樂城演唱會講笑講出禍
搞到Joey係facebook度扯曬火 話全個娛樂圈浄係討厭佢一個
跟住佢又同特首個女網上開火 搞到同昔日兄弟秋生哥開拖
馬賽條艷舞片證明自己係性感尤物 我諗馬賽當時最想係條片有馬賽克
阿YU 趙頌茹擁有坎呵人生 係四歲六歲期間被親戚性侵
大個諗住可以嫁個好男人 點知最後會成為家暴受害人
成龍係中共禁毒宣傳形象大使 但係房祖名同柯震東竟然涉毒出事
黑仔到拍套荷理活電影嗰時 拍攝出咗意外死咗個攝影師
Coffee喺IFC殘廁同富二代gathering 呢個gathering嘅地點都夠哂新穎
有啲新聞講真唔敢rap得太直接 如果淨係要坐墊佢會搵Mandy 既環保又快捷
吳若希憑越難越愛今年事業好掂 佢緋聞男友係南華球星劉子健
點知佢撩少女裸聊仲要未成年 呢啲咪就係所謂嘅知人口面
家強發表拆夥真相同阿Paul興師問罪 搞到咁最心碎應該係天上嘅家驅
郭富城網交中港日韓18模 估唔到連城城咁嘅級數都要網交咁大煲
傳聞佢同學生妹微信交換肉照 邊估到天王原來都鍾意玩裸聊
相逢何必曾燒衣一夜洗版 期待蔣志光復出可以拯救樂壇
上次Eric Kwok演唱會阿Kay放飛機 所以佢話以後唔再寫歌俾謝安琪
搞到經理人夏森美發曬脾氣 不過我估Eric Kwok只係講笑唔會咁小器
傳薛凱琪係貓狗籌款吞錢正敗類 下次唱K等點番隻奇洛李維斯回水
Fiona唔開心可以去搵男友呻 等MV導演翻版阮經天氹番你開心
Rubberband 阿Kay CAllStar辭演澳門維穩騷 算你哋今次醒目唔係又會俾人噪
送禮勤嗰首北京北角 我先發覺原來不經不覺佢係咁愛國
雖然東星烏鴉哥北京衰吸毒嫖妓 但起碼證明佢係直佬唔係基
陳茵媺為BB棄貓貓太過無情 有無諗過咁對貓貓都好唔公平
睇真啲我個樣都幾似都敏俊C 但係幾時先會搵到我嘅千頌伊
無啦啦定A餐同B餐逼人揀 要㨂咁麻煩俾我梗係一次過要曬兩個餐
朱主席非禮又走數周圍呃飯食 證明原來人無恥真係天下無敵
演藝人協會選新會長 點知中途秋生同芷菁打大仗
結果會長之位由愛國嘅成龍選上 咁即係會旨繼續以維穩至上
蘇絲黃為三個茶包名譽為掃地 請廣傳等佢教精你咩叫唱人終害己
我諗係靚模都羨慕Angelababy 有幾多靚模生日禮物係收架Lambogini
又林建名又周子揚嘅何傲兒 我諗佢呢type應該係叫做老少咸宜
Sammi 12場演唱會啲飛爭到癲 唔知有幾多係因為知我做嘉賓想見我一面
張繼聰教識我原來猜枚可以用胸肌 其實我都想學佢咁樣做個SRK
如果張學友係張家輝哥哥 咁馬小靈都應該係馬國明老婆
如果中國女排有沙賓娜 以後排球賽門票肯定爭到啲毒男仆崩牙
Let It Go應該係史上最煩主題曲 每次未聽到Intro我淨係想快啲結束
二次創作 罪與佛 改詞歌頌佛祖 咁你鍾意活佛VIVA定忘情釋迦舞
舊年唔只興K-POP仲興MK POP 要紅首先要豁豁出去夠沙卜
男嘅要夠Chok有眼線風格好韓國 主打登錄太陽唔知以為簽咗太陽娛樂
今年MK Pop仲有好多新力軍 Mama Easy 媽媽今天不必擔心
今年阿Gem直頭係風頭躉 係我是歌手入面不停飆高音
正所謂唱歌最高深莫過於唱高音 唱得越高音越高分貝就越高分
再睇吓現場觀眾個樣幾肉緊 所以你明點解佢可以攞亞軍
一攞獎阿Gem內地榮升女神 留係內地搵人仔香港從此唔見人
Killersoap嘅Rocky勇闖中國好聲音 用月伴小夜曲打動萬千樂迷嘅心
睇完中國好聲音被Robynn & Kendy嚇親 因為咁先知Roybnn原來係中共元老後人
昔日艶星鄭艶麗係麥記打工 有骨氣自食其力值得我哋尊重
一代宗師橫掃舊年嘅金像獎 可惜梁朝偉俾張家輝搶咗男主角獎
譚小環唔做港姐走去做魚蛋西施 佢賣魚蛋仲出名過佢拍電視嗰時
TVB為咗抗衡HKTV開台 連王祖藍求婚都擺埋上檯
係台慶同李亞男求婚咁公開 點知被踢爆求婚前婚禮已經籌備咗好耐
謝霆鋒王菲11年後世紀復合 證明有緣假以時日始終會失而復得
王菀之既然同Eric So係情侶關係 照估計遲吓Ivana都會出個FIGURE公仔
蕭正楠黃翠如因為拍戲日久生情 最傷心唔係fans肯定係洪永城
Shiga新男友有6呎高 咁以後改口唔敢再叫佢做K-Chek嫂
恭喜阿公蘇永康結婚 佢話做我女人肯定越吻越開心
古巨基同Lorraine低調到無法想像 20年後終於公開同拉埋天窗
黎諾㦤同Mr嘅ALAN都做億萬女婿 跪求兩位記住帶挈吓馬米
Ella不幸面癱好彩好快好番 而且以後有老公就唔再會孤單
以前黃婉曼嘅天氣報告屬於大家 但而家佢已經俾佢老公私有化
大導演彭順有李心潔都仲偷食 Liddy呢個名一夜之後就無人不識
陳七因為再偷食同未婚妻未結先分 既然未玩夠好心就咪學人求婚
傅嘉利輕啜中年發福肥叔叔 靚女嘅品味果然超凡脫俗
黎瑞恩證明一人有一個夢想 嫁入豪門可惜最後都係離婚收場
Bosco同楊崢大纜都扯唔埋 所以最後都係嚟得快去得快
Rest In Peace 影視巨人邵逸夫爵士 六叔用一生拍攝香港影視界輝煌史
演唱會之父張耀榮先生升天 多謝你喺香港樂壇咁多年嘅貢獻
午馬係肺癌末期仍然堅持拍攝 同你永別但你教識我哋咩叫專業
時裝女皇黎堅惠因病離世 我哋會永遠懷念你嘅時尚同美麗
亞洲鼓王Donald Ashley過身 Freedom@Heaven係佢嘅最後作品
奧斯卡影帝菲臘西摩荷夫曼死於毒癮 再一次證明毒品會禍害一生
一代笑匠Robin Williams抑鬱自殺身亡 又一個對人歡笑背人垂淚典型個案
Ice Bucket Challenge搞到潮流興淋冰 為肌肉萎縮症做善事全城和應
19歲靚仔cut唔到有線忍無可忍 終於帶刀去有線總部見人斬人
香港有乜炒乜停唔到炒風 上網抽吓iPhone 6 好過走去返工
WhatsApp新功能雙藍剔 男朋友再無得扮未睇女朋友信息
梁逸峰同學有特別嘅朗誦技巧 咁特別嘅技巧唔知係邊位老師教
政府將Space Invaders 70幅塗鴉鏟走 死蠢梗係拎去轉手隨時賺返幾球
外國人真係玩到無嘢好玩 玩身份證上中文名改做激烈的海膽
名畫當垃圾掉去堆填區多得清潔阿姐 所以話藝術嘅嘢常人識條鐵咩
巴西世界杯你有無買勁德國係拎冠軍 我就對巴西被人炒6粒印象係最深
網上金曲話你戇鳩怕你嬲內容寫實 仲有獨自去鳩嗚你唔會唔記得
加埋齊昕嘅母親厚多士仲聽過乜 當然唔少得生果佬榴槤乜乜乜
千六隻紙熊貓到港希望大家支持環保 但係大家影完相之後當乜事都無
天降冰雹又一城變水舞間 黑雨水浸天下水淹多個港鐵站
Dr Tree Gun 唔知以為佢文盲 唔係點噏得出悔辱雞毛鴨蒜明張目膽
殺出兩條洋腸難為了港男 本來港男有得開餐結果變返一支冷
啟晴邨槍擊案嘅殺人兇手 奇情到竟然係彭順小三Liddy老豆
虐待印傭ERWIANA咁陰騭 涉案羅允彤好眉好貌生沙蝨
許仕仁衰貪心高官變階下囚 七年半刑期臨老先有排受
郭炳江都判咗5年有排踎 證明真係天網恢恢疏而不漏
上海福喜食品將過期肉加工 麥當勞呃人話福喜食品佢哋無用
被踢爆馬上道歉轉口風 就算派埋煙肉蛋都挽救唔到你哋嘅信用
強冠食油aka強冠地溝油 香港商人向強冠提供原料廢油
轉頭製成食物係市面出售 香港好快好似大陸無嘢再放得入口
馬尼拉人質事件總算到此為止 經過家屬3年8個月嘅堅持
菲政府終於對事件正視 願意對失職人仕懲治並表達歉意
兩億解款車平安夜壞門跌五千萬 以為天降橫財成班人諗住執完唔使還
點知唔好彩附近裝咗天眼 結果當然係被人上門拉人當賊辦
呂品韜投訴冬奧無隊醫隨行 香港政府係咁現實認金牌唔認人
老牌球會愉園爆打假波爆醜聞 香港波都有人賭先係奇聞
將小狗丟落洗機攪死嘅人渣 你嘅懲罰應該係拉你返上大陸打靶
街市竟然公然賣活剝貓狗皮 呢度係香港搞到好似返咗內地
旺角殺街趕絕街頭表演 但係政府又話全力支持藝術發展
兩個港女去台灣做租霸 到處破壞又偷嘢丟曬香港人架
好多朋友需要大家捐肝續命 好似女嬰蓁蓁思諾健美先生阿勝
好彩最後有有心人士自動請纓 請支持器官捐贈隨時救人一命
海洋公園有得翻身全靠盛智文力輓狂攔 但係政府最後踢走人太過橋抽板
前英國球會伯明翰班主楊家誠 終於被裁定洗7億黑錢罪成
澳門歐文龍貪污案裁定罪成 大劉羅神各判63個月有期徒刑
東方創辦人馬惜珍申請撤銷通輯令 但高等法院即場駁回申請
香港龍師節表面話宣傳國粹 原來係陳鑑林同啲師傅內匑ap水
可憐靚模被棄屍旺角垃圾站 不幸遇上變態龍友殺人唔眨眠
有公司5億收購神魔之塔計劃告吹 曾建中呢鋪真係見財化水
馬航客機MH370飛行途中失蹤 至今仍然沒人搵到佢確實嘅行蹤
到底係真相被政府密封 定係客機真係憑空消失得無影無蹤
泰國反對派癱瘓曼谷反政府示威 最受影響係香港人嘅旅行大計
唔係黃秋生拍嘅電影劇情 今次真係西非爆發伊波拉疫情
美國有警察殺人I can’t breath 黑人殺返警察復仇 is not what we need
屹立超過60年遮王何洪希收山 一代遮王自此絕跡中環
樹仁大學以你最德高望重 響起最後鐘聲 Good Bye DR Chung
港大學生伍庭發生命完美總結 憑籍堅毅係人生路上光榮畢業
石峽尾邨某單位被氣體大爆炸摧毀 向殉職嘅消防總隊目梁國基敬禮
齊昕嘅母親衣著浮誇 一身全紅打扮唔知以為波士頓龍蝦
梁齊昕send自薦信話想做模特兒 咁嘅樣谷爆胸做靚模都唔pass
佢仲有舗癮界手傷害自己 老豆即刻post全家福證明一團和氣
但原來一切只係成家做戲 假到咁我不禁倒抽一口梁氣
梁振英出名歧視窮人 話有份參與選特首唔應該係基層
尤其係嗰啲月入低於萬四蚊 又話經濟貢獻宗教體育無份
梁特首講到自己為人民服務 但係點解除咗公職喺UGL有秘撈
又話出乜招物招樓價會大幅下調 係就唔使居屋一出第一日就幾萬人爭表
高鐵因為大雨工程停滯不前 浸壞機器仲諗住遮遮掩掩
超支幾十億最後要市民搞掂 當日投贊成票議員還我血汗錢
港鐵殘忍車死唐狗惹眾怒 呢舖你出幾多煽情廣告都兜唔到
啱啱新開通港大堅尼地城兩個站 土瓜灣站發現千年古蹟工程受阻攔
西九龍工程延期話遇上花崗岩 呢舖港鐵正宗痾屎唔出頼地硬
港鐵成日加價話機制可加可減 可惜延誤故障次數有加無減
港珠澳大橋工程超支55億 政府根本係Benz迫力 辦事不力
夾粗剪布通過東北前期撥款申請 真係一閃一閃小吳亮星
何俊仁立法會上睇J圖 好彩當年參選特首佢選唔到
伍珮瑩被辭職背後嘅真相 唔使問阿貴呢招叫抽後算帳
今年訪港人數再創新高嘅自由行 係帶旺消費指數但影響民生
市民生活受影響政府漠不關心 提議限制人數又話唔可行
特首加句未富先驕先過份 講到無咗內地自由行香港地會冧
內地遊客搞到遍地黃金 但蘇錦樑竟然叫港人要有包容之心
滬港通起動話幫到香港 搞咁多不如直接對窮人派糖
港視申請免費電視牌照失敗咗 不過轉型做網絡電視終於啟播
但係開台日竟然撞正TVB台慶 黃維基呢嘢唔知想攞景定贈興
亞視玩到有兩個月糧都出唔到 難怪新聞直播中途主播會無稿
體育新聞王子伍家謙辭職 佢同佢師傅伍晃榮都成為集體回憶
明報突然將總編輯換人 擺明想干預新聞報導編採方針
劉進圖遇襲掀起軒然大波 新聞界怒吼They can’t kill us all
李慧玲突然被商台下崗 係咪為咗續牌真係要問返首席智囊
蔡東豪結束主場新聞去毅行 換名以立場新聞重生惹公憤
新聞界用藍絲帶象徵反暴力 邊諗到後來藍色會象徵最暴力嘅顏色
一本白皮書當正我哋白皮豬 又話我哋有幾多權力係中央賦予
港人治港只係甜言蜜語 一國兩制前景認真堪虞
帶領佔領郵輪嘅蔣麗芸 率領幾百人同船公司抗爭
佢反佔中但又係香港佔領第一人 咁即係只許州官放火不許百姓點燈
民主嘅道路從未平坦 64 25年香港人仍然堅持平反
梁國雄被判監四周 變咗短毛但長毛呢個名始終改唔到口
孤星淚嘅 Do You Hear The People Sing 無人無聽過試問誰還未發聲
林新強話要求法官愛國無問題 抵呀擦鞋仔擦到無埋律師會長個位
喜記老細非禮完人又瞓街 抵你條荗柴無人食你啲臭蟹

I do it for the people
I do it for the culture
I do it for Hip Hop
一片晴空仍然佈滿黑雲 一街聲音照舊不聞不問
黃皮膚黃絲帶黃種人 守護緊呢片最後自由重鎮
係螢光幕上重溫睇住你再三重申 重新諗咩叫本是同根
同根生但點解無同情心 經過幾多清晨遙望獅子山精神
謠言駭人聽聞邊個暴民邊個平民 等後世用歷史做証人
戰事發生係每晚嘅凌晨 鏡頭之下太多觸目驚心
喚醒更多靈魂發出聲音 年輕人一夜之間長大成人
身邊唔理平民定名人 紛紛站起爭取自己嘅命運
我哋舉起象徵平和嘅雙臂 要求只係最基本嘅權利
真實我知從來係唔完美 普世價值應該係普世專利
選擇點解都仲要分尊卑 毋寧死直至到我斷氣
忘記唔到催淚嘅攻鼻 初次體會積累嘅勇氣
衷心問點解要敵視到如斯田地 私利用謊言去詐取
歪理指我哋破壞秩序 下令要人民全面撤退
台上只係一班著西裝嘅傀儡 黑色嘅光與白色嘅影
警告人們再無黑白分明 當有人荒謬到將現實等同電影
道出現今嘅香港已經幾扭曲變形 選擇沉默定沉睡寧願沉淪定沉醉
為別人爭取照樣被針對 兩種藍色嘅部隊行為一致野蠻暴戾
暗角紀錄光明磊落嘅證據 慈母手中觸動我哋嘅情緒
事實文字被自我過濾 以後如何分辨是非錯對
底線退無可退黑暗嘅旋渦舉起相傳嘅火距 人群躺卧於街道用肉身抵擋歹徒
瞓身捍衛叫做家嘅小島 高高在上嘅領導幾時先見到
一國兩制都話過只係口號 幾多面譜終於原形畢露
當發問被視為暴徒 扭曲嘅報導將你私心暴露
點解爭取會係誤入歧途 今日只係起步終點未到未敢停步
粉筆下嘅花係無價 偏偏係高牆上種出鮮花
一筆筆畫出一點點變化 種花變做戰靶一則可怕嘅白色笑話
一對對天真爛漫嘅眼 望住打開晴天下嘅雨傘
象徵我哋嘅期盼 期盼有日高牆會被推翻
期盼有日戰勝嘅係雞蛋
We do it for the culture.
We do it for our home.
And we will be back
We will be back
We will be back

返回列表