返回列表 回復 發帖

15 HK Rap Up (Radio Edit) - MastaMic

本帖最後由 檸音樂 於 2016-2-2 19:11 編輯

作曲:陳瑋洛
填詞:MastaMic
編曲:陳瑋洛 / Joey Lam / MastaMic
監製:MastaMic

Lyric @ Lemon Music Group  檸音樂歌詞網

一年又一年今年嚟到第八年Rap Up
一年一度嘅Rap Up當然唔會消失
一年一次我會用rap去總結過去365日
事不宜遲睇下今年我又會rap乜

江華五張嘢無做幕前轉做保險
佢狠評嘅娃娃舜十幾年後反而有得表演
50歳美魔女羅霖出寫真仲要加印
話唔定我阿媽都可以出嚟行性感
如果阿叻真係叻到Facebook由佢創辦
咁佢當年點會一舗就蝕咗幾千萬
四哥怒摑曾江錯手將胡楓眼鏡打竵
Joe Junior堅持揸咪化身做戰地記者
梅艷芳連內衣褲都被人網上拍賣
未見過有遺產管理人係咁_街
大閱兵有藝人話睇到感動流淚
咁感動點解唔加入解放軍為國捐軀
Juno一首《羅生門》喺樂壇一舖翻身
由幕後紅到幕前真係紅歌又紅人
家強同CY台上合唱完再影相
原來一早有人已經背棄了理想
阿Sa嚮《雛妓》套戲演技大昇華
其實我最羨慕係男主角任達華
既然阿Sa你同的士陳都分開咗
如果你鍾意細過自己不妨考慮吓我
亞視一拖再拖員工嘅薪金
咁都夠膽自稱做亞洲良心
最後續牌失敗 終於壽終正寢
邱德根知道死咗都隨時激到彈起身
黃曉明Angelababy擺200圍世紀婚宴
淨係敬酒環節隨時敬到零晨三點
當有人唱叮噹可否不要老
但可惜林保全已經唔再喺度

如果薛國強行路快過電車咁異於常人
佢應該代表香港去參加下屆奧運
南韓中東呼吸中級綜合綜合呼吸綜合症
我估應該係最橋口摻手嘅醫學名稱
廉署用咗三年完成調查曾蔭權
佢係香港史上被起訴嘅最高級官員
搞創新及科技局但又要打擊Uber
咁樣都叫支持科技真係自打咀巴
港鐵唔俾乘客攜帶大型樂器
但係偏偏比水貨客帶大件行李
兩場港中大戰0:0 守到最後
俾大家見識到香港有層次嘅足球
巴黎恐襲香港Facebook頭像換曬法國國旗
真心為別人加油定係順應潮流要問返你
般咸道石牆嘅百年古樹漏夜被斬
路政署決定草率正宗殺樹唔眨眼
創辦20年嘅八卦雜誌忽然一周
今年突然停刊即刻變做忽然一收
馬雲買起過百年歷史嘅南華早報
咁南早以後咪會變做紅早
係香港逾期居留九年嘅懷仔
搵陳婉嫻諗計最終自願遣返無得留低
區議會選舉見證政治新世代嘅掘起
先有葛珮帆消失再將鍾樹根連根拔起
如果胸部可以襲警咁神奇
咁好多靚模都攜帶大殺傷力武器
朱經緯追打市民發生咗成年
人哋退休攞埋長糧都未有任何進展
光明磊落七警幾時先會被人告
搞咗一年終於正式落案起訴
不過同日曾建超被預約拘捕
竟然係戚秦氏翻版原告可以變成被告
特首話䕶老院虐老關土地問題事
咁佛光街對情侶咪係土地問題最佳例子
佢仲話自己權力嚟自中央所以地位超然
最抵死係佢後邊嘅官員聽到反應愕然
梁齊昕自爆媽咪唔係佢親生媽咪
再兜巴摑呢個唔係佢親生媽咪嘅媽咪兩次
第三條跑道嘅空域問題仲未解決
就已經大嗱嗱千幾億幫香港人大出血
高鐵不停超支事件 已經夠曬痴線
最危險係到而家仲未搞掂一地兩檢
建制派表決前拉隊離場話要等埋發叔
結局大比數否決劉皇叔無啦啦中伏
啟晴邨未來應該會有好多iron man
因為食水含鉛量超標到得人驚
吳克儉TSA公聽會又唔出現
市民訴求擺埋一邊去日本食個放題先
港大校委嫌陳文敏無博士學位喺手
話有校委跌親冇show sympathy冇人問候
政府上載《喜歡你》都觸犯版權修訂條例
連政府都犯法你就知條法例係幾易中計
感謝聽緊呢首歌嘅每一位
沉澱咗兩年馬米今年全面回歸
全新嘅嘅音樂配合全新嘅班底
你哋期待咗兩年嘅新專輯即將面世

返回列表