陳慧琳出街密冚凸肚look look

law1012

陳慧琳（Kelly）為保其靚女icon，下月即將臨盆的她，仍堅拒被拍到凸肚look，昨日她到中環睇醫生，除了戴cap帽、着鬆身衫褲、大袋遮肚施掩眼法外，更和傳媒「玩」半個鐘捉迷藏避免上鏡，不過鏡頭後的Kelly則相當大方，打算BB出世後即公告天下。
Kelly懷胎五個月時，出席完一個公開活動及拍畢護膚廣告後，正式開始深居簡出，除了要靜心養胎外，靚字當頭的她亦怕其大肚婆look，會破壞她多年塑造的索女形象，因而選擇「閉關」。
由頭包到落腳昨午二時四十五分，記者在中環太子大廈門口，巧遇將於下個月臨盆的Kelly，雖然氣溫高達32℃，不過Kelly仍無懼高熱全身包到實，戴上cap帽、厚軍褸、黑長褲，終於放棄至愛的高跟鞋改穿平底涼鞋，造型前衞，和身邊穿背心、短褲，清爽打扮的女助手相映成趣。
當素顏只塗上口紅、準備上樓睇醫生的Kelly發現記者時，即時耷頭用帽遮住大半邊臉，半眼也不敢望避鏡頭，又用大手袋遮肚，邊扮摷袋邊說：「唔好影啦。」就算記者叫Kelly影張靚相，她都面帶笑容婉拒說：「大肚婆點會靚㗎！」隨即施調虎離山之計，在助手及經理人鍾珍的陪用下離開，前往文華東方酒店，只見Kelly步伐輕盈，肥肚不肥身，手腳纖瘦，仍不失是靚媽一名。
老公產房影DV其後Kelly和傳媒在位於十五樓，生殖醫學專科何永超診所門外碰面，當她發覺「妙計」事敗時，即面壁用背脊「得」住鏡頭，再和女助手商量對策，最後決定取消覆診，寧不搭改行後樓梯快閃，期間有保安上前阻擋。
據知Kelly懷孕期低調不拍照，全因自感「肥咗唔夠靚女」，為免無謂曝光，有關她何時、在哪間醫院分娩也要保密，除老公劉建浩（Alex）知道外，絕不向外人透露半句。Kelly同時要求院方為她守秘密，不過她決定等BB出世後，就會第一時間通知傳媒分享她初為人母的喜悅，暫時Kelly尚未決定開刀還是順產，連會否餵人奶也由醫生決定。據知，Alex已買定新款攝錄機陪Kelly入產房，拍攝BB降生一刻，他還請定假陪老婆坐月。